Meginmarkhópur Klettabæjar er börn, ungmenni og fullorðnir sem hafa þörf fyrir einstaklingsmiðaða þjónustu og sértækan stuðning.

Áhersla þjónustunnar er því á heildræna og einstaklingsmiðaða nálgun þar sem tekið er mið af þjónustuþörfum og aðstæðum hvers og eins.

Miðað er að því að mæta hverjum og einum einstakling út frá þeirra þörfum og bjóða upp á eins þroskavænlegt og heimilislegt umhverfi og mögulegt er.

Klettabær starfar eftir hugmyndafræðinni um fjöláfalla- og tengslamiðaðan stuðning.

Einstaklingsbundin þjónustuáætlun

Í upphafi er sett upp einstaklingsbundin þjónustuáætlun í samstarfi við málsaðila. Þjónustunotendur eru mikilvægustu aðilar þeirrar vinnu og tekur þátttaka þeirra og samvinna mið af þroska, aldri og aðstæðum hverju sinni.

Réttindi þjónustunotenda

Í öllu okkar starfi höfum við Samning sameinuðu þjóðanna um réttindi fatlaðs fólks, Barnasáttmála sameinuðu þjóðanna auk allra gildandi íslenskra laga og reglugerða að leiðarljósi.

Markmið

Markmið okkar er hlúa að þeim mikilvægu verkefnum sem okkur er treyst fyrir og þróa starfsemina enn frekar í samráði og samstarfi við málsaðila og í samræmi við þá þörf sem er í samfélaginu.

Hugmyndafræði Klettabæjar

Fjöláfalla- og tengslamiðaður stuðningur byggir á fræðum og rannsóknum á tengslum, áföllum, taugavísindum og þroska barna. Felur þessi nálgun meðal annars í sér að kröfur á einstaklinginn fari ekki fram úr forsendum þess og að stuðlað sé að jákvæðum þroska með sífelldri „fínstillingu” að „hér og nú” þörfum viðkomandi. Til þess að geta veitt slíkan stuðning þarf starfsfólk að fá þekkingu, reynslu, færni, þjálfun og hafa einlæga löngun til þess að verða að liði. Þannig er auðveldara fyrir starfsfólk að skyggnast á bak við ,,hér og nú‘‘ hegðun barnsins þannig að auknar líkur séu á því að þörfum barnsins sé mætt á þroskavænlegan máta.

Skilningur á orsökum tengslavandans

Mikilvægt er að hafa skilning á orsökum tengslavandans en það dregur úr líkum á því að nota uppeldisaðferðir sem gagnast ekki eða valda barninu áframhaldandi skaða (e. retraumatizering).

Skilja hegðun í tengslamiðuðu samhengi

Við leitumst ávallt við að veita barninu öryggi, traust, festu og ramma. Reynt er að skilja hegðunina í tengslamiðuðu samhengi en með því aukast líkur á að barnið læri að ráða betur við tilfinningar sínar og hegðun ásamt því að koma fram af vinsemd, virðingu og yfirvegun í krefjandi aðstæðum. Í daglegri vinnu er einnig stuðst við atferlisfræði og notast við dagssamninga, sjónrænt skipulag, þrepakerfi, litakerfi o.fl. í samræmi við þarfir hvers og eins þjónustunotanda.

Stuðningur

Tengslamiðaður stuðningur snýr að orsökum vandans. Markmiðið er að einstaklingurinn nái að þroskast með því að hjálpa honum að verða öruggari, tengdari og tilfinningalega stöðugri.

Vilt þú vita meira um starfsemi Klettabæjar?

Sendu okkur tölvupóst og við svörum þér eins fljótt og við getum.

Hafa samband